“An datos na malinaw, pundasyon nin mas marhay na pag-gobierno.”

2024 𝐂𝐨𝐦𝐦𝐮𝐧𝐢𝐭𝐲-𝐁𝐚𝐬𝐞𝐝 𝐌𝐨𝐧𝐢𝐭𝐨𝐫𝐢𝐧𝐠 𝐒𝐲𝐬𝐭𝐞𝐦 𝐏𝐫𝐞𝐥𝐢𝐦𝐢𝐧𝐚𝐫𝐲 𝐑𝐞𝐬𝐮𝐥𝐭𝐬 𝐨𝐟 𝐓𝐢𝐧𝐚𝐦𝐛𝐚𝐜

15 Agosto 2025 | Tinambac, Camarines Sur

An banwaan nin Tinambac, sa pangengenot ni Mayor Edward Albert “Bobit” P. Prades, dara an panibagong lakdang para sa mas malinaw asin epektibong pag-gobierno sa paagi kan Community-Based Monitoring System (CBMS). Sa paagi kan Philippine Statistics Authority (PSA) – Provincial Statistical Office nin Camarines Sur, pinapamayuhan ni Sir Raul Aspe, presenter Senior Statistical Specialist ma’am Jovylyn J. Cacho, siring man ni Ma’am Babylyn B. Armea na ipinasabot an tunay na kamugtakan kan banwaan sa preliminary results kan 2024 CBMS na may kamawotan na magtao nin tumpak, malinaw, asin detalyadong datos na magagamit kan lokal na gobyerno para sa pagplano nin mga programa asin polisiya.

Presenti sa nasabing presentasyon an mga lider asin personahes o empleyado kan banwaan: mga Department Head, Public Schools District Supervisors (PSDS), representante kan Philippine National Police (PNP) sa pamamayo ni PMAJ Glen Alumit, representante kan Civil Society Organization (CSO), asin miyembro kan Sangguniang Bayan sa persona nina Mun. Kgd Gina Brioso asin Jona Abiog. Ini nagpapahiling nin pagkakasararo para mapakarhay an padangat na banwaan asin maitama an mga bagay na dapat naaabot kan LGU-Tinambac.

𝐈𝐌𝐏𝐎𝐑𝐓𝐀𝐍𝐒𝐘𝐀 𝐊𝐀𝐍 𝐂𝐁𝐌𝐒

An CBMS sarong makabag-ong teknolohiya asin sistema para sa pagkolekta, pagproseso, asin paggamit nin disaggregated local-level data—datos na detalyado sagkod sa lambang barangay asin pamilya. Ginibo an kolekta nin datos puon Hulyo 15 sagkod Nobyembre 19 2024, mantang an proseso kan datos nagpapadagos puon Disyembre 4, 2024 sagkod Hunyo 19, 2025. Ini nagtatao nin malinaw na retrato kan kamugtakan kan banwaan sa iba-ibang aspeto nin buhay-komunidad.

An presentasyon naglaog nin mga estadistika sa akses sa kuryente, internet, malinig na gatong, suplay nin tubig, sanitasyon, seguridad sa istaran, kasiguruhan sa pagkakan, pagkua nin senior citizen ID, pag-eskwela, trabaho para sa kahubenan, akses sa serbisyo pinansyal, persepsyon sa seguridad publiko, asin estado nin pagkabuhay. Ini mga datos an magtutokdo sa gobyerno kun sain dapat ilaan an mga programa asin pondo, para sa mas targetado asin epektibong serbisyo publiko.

𝐃𝐈𝐑𝐄𝐊𝐒𝐘𝐎𝐍 𝐏𝐀𝐑𝐀 𝐒𝐀 𝐌𝐀𝐒 𝐌𝐀𝐔𝐒𝐖𝐀𝐆 𝐍𝐀 𝐓𝐈𝐍𝐀𝐌𝐁𝐀𝐂

Kaipuhan nin banwaan na an pagdesisyon sa mga proyekto asin programa nakabase sa totoo asin malinaw na datos. Kaipuhan na an polisiya nakasentro sa tunay na pangangaipo kan mga tawo, bako lang sa hiling o huna. Sa paagi kan CBMS, may kapasidad na an lokal na gobyerno nin Tinambac na abuton an mga prayoridad, masukol an progreso, asin masiguro na an gabos na programa magin kapaki-pakinabang sa lambang pamilya.

Sa preparasyon para sa opisyal na turnover kan CBMS datos, nakahanda na an banwaan nin Tinambac sa liderato ni Mayor Prades na gamiton ini bilang pundasyon kan mas matatag, progresibo, asin inklusibong paggogobyerno. Dangan, pinapatunayan kaini na “An datos na malinaw, pundasyon nin mas marhay na pag-gobierno.”