𝐁𝐀𝐑𝐀𝐍𝐆𝐀𝐘 𝐖𝐎𝐑𝐊𝐄𝐑𝐒 𝐀𝐒𝐒𝐄𝐌𝐁𝐋𝐘

Agosto 22, 2025 | Tinambac People’s Complex

Ngunyan na aldaw, sa pagpamayo kan satuyang mahigos na Alkalde Hon. Edward Albert “Bobit” P. Prades, kaibahan an mga matitibay na lehislador kan Banwaan nin Tinambac, matrayumpo na kinundusir an Barangay Workers Assembly.

An nasabing pagtiripon nagin dakulang oportunidad tanganing madangog mismo nin lokal na gobyerno an mga agrangay, pangangaipo, asin mga hamon na hinaharap kan satuyang mga barangay workers—partikular an Child Development Workers (CDW), Barangay Nutrition Scholars (BNS), asin Barangay Health Workers (BHW). Sinda an mga frontliners na pirmi nasa serbisyo para sa salud, edukasyon, asin kapakanan kan komunidad, kaya dakula an obligasyon asin trabaho na sinda pinagdadara sa aroaldaw.

Nagpaabot nin taos-pusong mensahe nin pasasalamat asin suporta an satuyang mga opisyal: Kgd. Bobot Prades, Kgd. Owe Velarde, asin Kgd. Kikay Delos Reyes, kaibahan man sina Kgd. Glenn Abiog, Gina Brioso, Itoy Velarde, asin Jona Abiog. Sa saindang pagkakasararo, pinagtibay an padagos na suporta para sa mga programa asin inisyatibo kan LGU-Tinambac na nakasentro sa barangay workers bilang katuwang sa serbisyo publiko.

Sa mensahe mismo ni Mayor Bobit Prades:

“An satuyang mga barangay workers iyo an harigi kan komunidad. Dai sana sinda mga empleyado, kundi mga tunay na bayani na pirmeng nasa frontline kan serbisyo publiko. Kaya bilang saindang katuwang, pirmi kita naghahanap nin paagi para mas mapakusog an suporta asin benepisyo na para sainda. Kaipuhan ta an saindang kusog asin dedikasyon tanganing mas maray na Tinambac an satuyang mahigot na mabuo.”

Padagos an pagtutok kan Lokal na Gobyerno nin Tinambac na maglatag nin mga programa na mapapakinabangan kan barangay workers—ta sinda an harigi kan komunidad na nagbubugtak nin marhay na pundasyon para sa mas progresibong banwaan.

Sa pagtarabangan, mas magiging maogma asin progresibo an Tinambac!

𝑺𝒂𝒍𝒂𝒎𝒂𝒕 𝒂𝒔𝒊𝒏 𝑫𝒊𝒐𝒔 𝑴𝒂𝒃𝒂𝒍𝒐𝒔 𝒑𝒐