𝐏𝐀𝐆𝐑𝐔𝐌𝐃𝐎𝐌 𝐒𝐀 𝐀𝐋𝐃𝐀𝐖 𝐍𝐈𝐍 𝐊𝐀𝐁𝐀𝐘𝐀𝐍𝐈𝐇𝐀𝐍

𝑨𝒈𝒐𝒔𝒕𝒐 25, 2025 |

Sa aldaw na ini, rumdumon niyato asin pasalamatan an gabos na tunay na bayani kan satuyang nasyon. Sinda an mga nagdusay kan saindang buhay, oras, asin kusog para sa pagkamoot asin pagtalubo kan satong banwaan asin nasyon. An saindang sakripisyo iyo an nagtukdo sato kun pano magin matibay asin pusog na mag-atubang sa dakul na hamon nin buhay, asin an saindang pagkamoot an nagtatao nin magayon na kasaysayan na inaani ta ngonian.

Alagad an kabayanihan dai lang natatapos sa pagsalingoy kan kasaysayan. Yaon man an mga modernong bayani sa ngonian—an mga paraoma na pirming nagtatanom tanganing igwa kitang pagkakan sa lamesa, an mga parasurog asin mga suldados/kapulisan na nagpapadanay nin seguridad asin katrangkilohan kan satong banwaan, an mga doktor/nurses na pirmeng nagduhol nin saindang kamot para iligtas an buhay kan iba, asin an mga paratukdo na nagbubunga nin kaaraman para sa kaakian. Dai man kita nakakalingaw sa mga ordinaryong tawo—mga magurang, mga trabahador, mga boluntaryo—na sa sadit man na paagi nagpapahiling nin marhay na ehemplo kan tunay na pagkamoot sa kapwa asin komunidad lalo na sa padangat niyatong banwaan nin Tinambac.

An kabayanihan, dakula man o sadit, an tunay na nagdadalan nin pag-uswag asin paglaom. Ipinapahiling kaini na bako lang sinda, kundi kita man, pwedeng magin bayani sa aro-aldaw na buot tang gibuhon. Bako lang an armas an pwedeng matao nin pag-omaw, kundi an matibay na puso, maray na buot, asin taos-pusong pagtabang para sa kapakanan kan gabos.

Kaya sa aldaw na ini, ipagpasalamat ta an gabos na sakripisyo kan mga bayani, lumang panahon man o modernong aldaw. Sainda ta hinahagad an inspirasyon asin sainda ta isusunod an ehemplo kan pagkamoot sa banwaan asin kapwa.

Happy Heroes’ Day po saindo gabos! Mabuhay an mga Bayani nin Tinambac! Mabuhay an mga Bayani nin Pilipinas!

Pagbati,

Lokal na Gobyerno kan Tinambac

Hon. Edward Albert “Bobit” P. Prades

Municipal Mayor