“𝐵𝑎𝑤𝑎𝑡 𝑏𝑎𝑡𝑎, 𝑚𝑎𝑦 𝑔𝑎𝑏𝑎𝑦. 𝐵𝑎𝑤𝑎𝑡 𝑝𝑎𝑛𝑔𝑎𝑟𝑎𝑝, 𝑎𝑏𝑜𝑡-𝑘𝑎𝑚𝑎𝑦.”

𝗔𝗥𝗔𝗟 𝗡𝗔!

One DepEd Tinambac Launching of the 𝐀𝐜𝐚𝐝𝐞𝐦𝐢𝐜 𝐑𝐞𝐜𝐨𝐯𝐞𝐫𝐲 𝐚𝐧𝐝 𝐀𝐜𝐜𝐞𝐬𝐬𝐢𝐛𝐥𝐞 𝐋𝐞𝐚𝐫𝐧𝐢𝐧𝐠 (ARAL) Program

Tinambac Central School 1 | Oktubre 8, 2025

Sa pagpanginot kan Department of Education–Tinambac, matrayumpo na naisagibo an pormal na Launching kan Academic Recovery and Accessible Learning (ARAL) Program na may obheto maibalik asin mapalawig an kalidad nin edukasyon pagkatapos kan mga naging hamon sa mga naglipas na taon. An ARAL Program sarong pambansang inisyatibo nin Department of Education na may obhetong matabangan an mga estudyante na makabawi sa mga nawarang kasanayan sa pagbasa, pagsusurat, asin matematika. Ini nagpopokus sa pagtao nin accessible, inclusive, asin quality learning interventions para sa gabos na mga estudyante partikularmente sa banwaan nin Tinambac—lalo na sa mga kaakian o kahubenan na nangangaipuhan nin mas halangkaw na gabay asin atensyon sa pagtukdo.

Presente sa nasabing okasyon an mga Public Schools District Supervisors sa banwaan, Mr. Ernesto V. Garinga Jr., Tinambac South District, Mr. Ronald D. Savilla – PSDS, Tinambac North District asin Mr. Joselito N. Moldez – PSDS, Tinambac East District.

Yaon man an mga school heads, principals, paratukdo, non-teaching personnel, asin mga estudyante na hale sa mga eskwelahan kan Tinambac na nagpahiling nin suporta asin tiwala sa programa.

Bilang representante kan Lokal na Gobyerno nin Tinambac, yaon man si Konsehal Glenn Abiog, Chairman kan Komitiba sa Edukasyon, na nagpaabot nin mensahe nin inspirasyon asin paglaom sa mga paratukdo asin estudyante.

Sa pusog na liderato ni Mayor Edward Albert “Bobit” Prades, an LGU-Tinambac padagos sa pagpaabot nin suporta sa sektor nin edukasyon, sa paagi nin mga programang nagpopokus sa pagpauswag kan kaaraman, oportunidad, asin futuro kan kahubenan. An ARAL Program sarong paglaom, sarong paninindugan, asin sarong padagos na pangapudan para sa edukasyon. An programa sarong paagi tanganing matabangan an mga kaakian asin kahubenan na mas maging produktibo, responsable, asin edukadong namamanwaan kan Tinambac.

Kun padagos kitang magtatarabangan mas dakula an oportunidad na gabos magkaigwa nin maray na futuro para sa sarong banwaan na progresibo!

𝑲𝒂𝒚𝒂 𝒎𝒈𝒂 𝑻𝒊𝒏𝒂𝒎𝒃𝒂𝒄𝒒𝒖𝒆𝒏̃𝒐, 𝒕𝒂𝒓𝒂 𝒏𝒂! 𝑨𝑹𝑨𝑳 𝑵𝑨!