𝐓𝐈𝐍𝐀𝐌𝐁𝐀𝐂 𝐔𝐏𝐃𝐀𝐓𝐄𝐒|

Agosto 12, 2025 | Banwaan nin Tinambac

Mga Hapot Asin Katuyohan sa Cities and Municipalities Competitiveness Index (CMCI) Program

“An marikas na banwaan, dae ini produkto nin swerte — ini resulta nin malinaw na pangiturugan, kusog kan pagkasararo, asin padagos na aksyon para sa kauswagan.”

Sa pagpangengenot ni Mayor Edward Albert “Bobit” P. Prades, nagkaigwa nin makahulugan na pagtiripon kaibahan an mga department head, mga focal person, asin si Mr. John Ryan Ticlao, CMCI Program Focal Person. An katuyuhan: surudon, himay-himayon, asin mas lalong pakusugon na ma-iangat an ranggo asin kakayahan kan Tinambac sa Cities and Municipalities Competitiveness Index.

Pinahiling ni Mr. Ticlao an malinaw na presentasyon manungod sa presenting posisyon kan banwaan sa limang harigi kan CMCI — Economic Dynamism, Government Efficiency, Infrastructure, Resiliency, asin Innovation. Pinaabot niya an mga marhay na naabot kan Tinambac, asin binisto man an mga kaluyahan na kaipuhan nin agarang aksyon asin koordinasyon.

Dakul an naging partisipasyon kan mga opisyales, na nagpresentar nin mga estratehiya, plano, asin mga lakdang na magpapakusog sa kakayahan kan Tinambac na makipagsabayan, dae lang sa Bicol kundi man sa bug-os na nasyon.

Pinagtibay ni Mayor Prades an dedikasyon kan LGU sa padagos na pagpauswag nin serbisyo, pag-abot nin oportunidad para sa gabos, asin pagbangon nin Tinambac bilang sarong progresibo, resiliente, asin inspiradong banwaan.

“An progreso, dai ini sarong destinasyon — ini sarong padagos na biyahe na kaipuhan nin gabos na kusog. Sa Tinambac, dae kita basta magiging kompetitibo, kundi magin modelo kan pag-uswag.”