𝐋𝐎𝐎𝐊 | 𝐏𝐂𝐒𝐎 𝐂𝐇𝐀𝐑𝐈𝐓𝐈𝐌𝐁𝐀 𝐑𝐄𝐋𝐈𝐄𝐅 𝐃𝐈𝐒𝐓𝐑𝐈𝐁𝐔𝐓𝐈𝐎𝐍

Ngunyan na aldaw nin Martes, Nobyembre 18, 2025, nagkondusir an Philippine Charity Sweepstakes Office nin Charitimba Relief Distribution sa banwaan nin Tinambac sa pakikipagtabangan kan Lokal na Gobyerno nin Tinambac sa liderato ni Mayor Bobit Prades, para sa satuyang mga kahimanwa na pinaka nadistroso asin naapektohan ni Super Typhon Uwan.

Mismong si PCSO General Manager Melquiades Robles an nanginotan sa aktuwal na pagdistribwer kan mga tabang-ayuda kaibahan an satuyang matibay na Ama kan Partido, Congressman Arnie B. Fuentebella, asin si Mr. Bong Rodriguez na yaon man pirmi an pagmangno sa banwaan.

Presente sa programa an bilog na miyembros kan Sangguniang Bayan sa pamamayo ni Vice Mayor Ervin T. Borja na dae nagsasawang magsuporta sa mga programa asin inisyatibo kan lokal na gobyerno sa lindong kan administrasyon ni Mayor Bobit Prades.

An Charitimba Relief Distribution resulta man kan padagos na espwerso, inisyatibo, asin paghigos kan esposa kan satong alkalde, First Lady Belle Prades, na dae napapagal sa paghahanap nin mga paagi tanganing madagdagan an tabang para sa banwaan.

Nagpasalamat si Mayor Bobit Prades sa Philippine Charity Sweepstakes Office sa tabang-ayuda na pigtao para sa satuyang mga kahimanwa, asin an padagos na pag anduyog urog na sa kasaraditan, siring man sa gabos na padagos na nag-aalalay asin nag- oopresir nin tabang sa banwaan sa oras na kinakaipuhan.

Sa liwat, Dios mabalos po sa saindo gabos, sa ngaran kan Lokal na Gobyerno kan Banwaan nin Tinambac!